សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងថា…
|
សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងថា កម្ពុជាមានផែនការអភិវឌ្ឍគម្រោងវិនិយោគលើប្រព័ន្ធដឹកជញ្ជូនអន្តរមធ្យោបាយនិងភស្តុភារចំនួន ១៧៤ គម្រោង ដែលមានតម្លៃសរុបប្រមាណ ៣៦,៦៨ ប៊ីលានដុល្លារអាម៉េរិក។
សម្តេចធិបតី ហ៊ុន ម៉ាណែត ថ្លែងក្នុងកម្មវិធី «អាហារពេលព្រឹកស្វែងរកដៃគូ» ការលើកឡើងនេះគឺធ្វើឡើងនាឱកាសដែលសម្តេចធិបតីចូលរួមកម្មវិធី «អាហារពេលព្រឹកស្វែងរកដៃគូនៃកិច្ចប្រជុំកំពូលធុរកិច្ចនិងវិនិយោគអាស៊ានឆ្នាំ២០២៤» កាលពីថ្ងៃទី១០ ខែតុលា ឆ្នាំ២០២៤។ សម្តេចធិបតី ហ៊ុន ម៉ាណែត បានរំលេចអំពីផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយនិងភស្ដុភារកម្ពុជា ២០២៣-២០៣៣ ដែលកំណត់បាននូវគម្រោងអាទិភាពចំនួន១៧៤ ក្នុងនោះគម្រោងផ្លូវថ្នល់ចំនួន៩៤ គម្រោងផ្លូវដែកចំនួន៨ គម្រោងដឹកជញ្ជូនតាមផ្លូវទន្លេចំនួន២៣ គម្រោងដឹកជញ្ជូនតាមផ្លូវសមុទ្រចំនួន២០ គម្រោងផ្លូវអាកាសចំនួន១០ គម្រោងប្រព័ន្ធឡូជីស្ទីកចំនួន១៥ និង គម្រោងបន្ថែមផ្សេងៗទៀតចំនួន៤។
សម្ដេចធិបតីមានប្រសាសន៍ថា ផែនការមេរយៈពេល ១០ ឆ្នាំនេះបង្ហាញពីកាលានុវត្តភាពពិសេសនិងគ្មានដែនកំណត់សម្រាប់វិនិយោគិនក្នុងតំបន់និងអន្តរជាតិ ជាពិសេសការពិចារណាទៅលើការអភិវឌ្ឍតាមយន្តការភាពជាដៃគូរវាងរដ្ឋនិងឯកជន។ ក្នុងទសវត្សរ៍ចុងក្រោយនេះ កម្ពុជាតែងតែឈរនៅលំដាប់ខ្ពស់ក្នុងចំណោមបណ្ដាប្រទេសមានការអភិវឌ្ឍតិចតួច (LDC) ដែលទទួលបានការវិនិយោគពីបរទេសច្រើនជាងគេ។ ការដាក់បញ្ចូលកម្ពុជាទៅក្នុងបញ្ជីតាមដានគោលដៅ FDI ដែលលេចធ្លោ ២០២៤ ដោយឈរនៅលំដាប់កំពូលទាំង ៥០ លើពិភពលោកបានគូសបញ្ជាក់អំពីភាពទាក់ទាញរបស់កម្ពុជាសម្រាប់វិនិយោគិនជាសកល។ សម្តេចធិបតី ហ៊ុន ម៉ាណែត បញ្ជាក់បន្ថែមថា កម្ពុជាមានកំណើនសេដ្ឋកិច្ចរឹងមាំ ខណៈរាជរដ្ឋាភិបាលបានរក្សានូវអភិក្រមដែលគាំទ្រធុរកិច្ច ដោយផ្ដល់ការគាំទ្រនិងជំនួយដល់វិស័យឯកជននៅគ្រប់ដំណាក់កាលនៃប្រតិបត្តិការអាជីវកម្ម។ កម្ពុជាបានអនុវត្តច្បាប់ គោលនយោបាយ និង យុទ្ធសាស្ត្រគ្រប់ជ្រុងជ្រោយ ដើម្បីលើកស្ទួយបរិយាកាសធុរកិច្ចនិងការវិនិយោគលើហេដ្ឋារចនាសម្ព័ន្ធសំខាន់ៗ ឱ្យមានលទ្ធភាពចូលទៅកាន់ទីផ្សារក្នុងតំបន់ បង្កើតការងារសមរម្យនិងការគាំពារសង្គម៕ |
